قصيدة للشاعر الكبير ابراهيم الرديعان ورد الشاعر الكبير بدر الحويفي

(ياراكب اللي)=
ياراكب اللي لامشى ماتقل ياط=من سرعته خطه دواوير وشخوط
جديد ماحمل به العفش وبساط=الإ ولا قالوا موضب ومخروط
مراتبه مخمل والارضية بساط=واشعار تايوتا على الخشم محطوط
يطرب إليا منه ضرب طلعة الغاط=لا حس لا ونه ولا صوت عرموط
ملفاك بدر إليا هبا كل قناط=قبل تقهوى واجب الضيف مليوط
عطه الكتاب اللي كتب بيد خطاط=كريم سبلا اللي له القيل مخطوط
قل ليا ضاق صدري جبت للنار ملقاط=وسحبت اللي كنهن صيغة بطوط
وفصلتهن تفصيل وزودتهن غاط=حديدهن صافي عن لحام وسقوط
وشبيت نارً جرمها من حطب راط=احسن من الصندل وراء سبعة شطوط
جرمً جزل ماهو هدب رمث وشعواط=وسويت فنجالً على الكيف مضبوط
بلكي يبرد واهجً بالحشا شاط=يشبه لدافوراً به الغاز مضغوط
يوم ان كلً في حلا نومته غاط=يرقد على طوله كما السدو ممغوط
عيني بحاجرها تقل موس صفاط=وجفنه تقول ملامسه ظفر شبوط
جيت الطبيب وقال لي ويش حاط=في داخل عينك دواوير ونقوط
وقلت هذي لها مدة شهر صابها أحباط=تسهر ودمعاته تقل وصف ناقوط
اسبابها اللي لفت الراس بمشاط=بالمسك والريحان والورد ممشوط
تقول خاطي فيضةٍ ريحها عاط=ريح النفل مع فايح الشيح مخلوط
لا هو بدعبول ولا محزمه غاط=زوله كما البردي ليانٍ وشمحوط
عين الغزال ما ذيره صوت مخباط=حبى له اللي ينقل الملح بمشوط
ولا شربت الببسي بكوبٍ وشفاط=تشرب من الشكوة مطعم ومشموط
ولا تلبس الكرته تحزمه بفراط=تلبس لباس اول مفصل ومخيوط
يابدر حاكيته وانا منه محتاط=وخلان من غيره مكبل ومربوط
هرجه لطيف مايقاطعك بغلاط=توُه من امه للمشاكيل ملقوط
ماهو من اللي هرجته سلك مغاط=يعطي كلام وباقي الهرج منطوط
ماذكر لنا مثله على عصر الانباط=اللي منازلهم وراء النيل واسيوط
اقفى وكنه يضرب القلب باسواط=عطان هرج وتالي الهرج مشروط
علمي بها يابدر في نزلة اشباط=غربٍ عنه موقع شمال عنه شوط
مدري مع اللي حدروا يمه الشاط=او هم مع اللي سندوا يمة الغوط
محتاج فزعتكم ترى طحت بوراط=الحال نشت كنها الشن مقروط
حالي من اسبابه بدت تقل مخاط=ومن قبل عرفي له مريحٍ ومبسوط
وصلاة ربي عد من شاف دمياط=على محمد عد من لبس مخيوط
ابراهيم الرديعان=
::::::::::=
يوم المولع=
يوم المولع واق في راس شمحاط=حول علينا من جبل طي بمقوط
حاديه من حب العماهيج مخباط=اللي بحرهن للعشاشيق زاروط
اللي نباهن للمعاليق معاط=ونظراتهن ترسل عباريد ومشوط
صبن على قلب الرديعان زقلاط=ودارت به المكره على سير مشحوط
واسند علي ابيات جزلات ونشاط=مثل الذهب واحد وعشرين مشروط
عملة ذهب ماهي دنانير وانواط=من شاعر ماهو بالأمثال خربوط
وسكُر على الطاروق ضبَه وصقاط=حيل الله أقوى كيف باحتال وانوط
حي الجواب اللي محنط تحناط=جاء من ابراهيم الرديعان صفوط
هدَف وتهديفه طريقة تشطاط=واللي عطاه الراي رجَال مضبوط
خطط له الخطة من الناس خطاط=قصده يسدد كل الانفاق ويحوط
وافق وركز له قريحة بحرف اط=وشاورشويره واستشاره وقال اوط
وطاعة براية وانتهت سبع الاشواط=واشرعليه باصبعة باخر الشوط
وارعد وجاء سيله مع الحزم جلاط=وفاضت معابيره على خبث وشطوط
الله يكافينا كفاحة ليا شاط=وقعة برد ماهو من السطح ناقوط
لقط عناقيد القريحة تلقاط=وخلى غصون من الورق بيض وملوط
واخذت مع دربه على الشوف مشواط=عساي احوز ارضاه ويكون مبسوط
وأنا معه جندي وهو صف ضباط=تحت الأوامر لو حصل ضغط وضغوط
مادامها لعبة حويلا ومزقاط=ماني مع الصاحب قصاوي ولا بوط
مهما حصل من بيننا مزح واغلاط=الحبل ماهو بين الاصحاب ممغوط
وان جت علوم ماتلفز بالأضباط=على بحر ماني على جال حابوط
لاعط لاصوات العماليق عطاط=اعرف جواب اللي عليه ضرب شوط
ماني من الذي ينطمع به وينهاط=وصفة علاجي للطماميع خانوط
وان جنبتني ماتورط توراط=مالي بوضع الناس قارط ومقروط
عنها ابتعد بعد الجزائر عن ارهاط=ماني مثير اسباب ومعقد اخيوط
هذا وابرسل للرديعان خياط=يخيط قلبٍ من قسى الحب مشعوط
العاشق اللي في بحور الهوى غاط=قلبه ليان ومن كراسيه ممعوط
شايب وقلبه بالولع سلك مغاط=من شوط تيار الغنادير مشلوط
وعشقة خطا الله لا يصلط تصلاط=كيف الغناوي حالته حال مزنوط
مدام له ملفا ومثبأ ومقلاط=عبير نجد وعنبر الشام مخلوط
يلعب على حبلين وافراش واصماط=كلش جديد ولا بهن همل واصفوط
ثنتين عنده يعملن كحل وامشاط=عفايفن ما لامحن كل شمحوط
لويسمعنه ولعن فيه شخاط=وتناوبنه بينهن قرص وعروط
قامن عليه وشلطنه تشلاط=ياشينهن عند الزعل موطهن موط
وعيالهن معهن بعصيان واسواط=حتى الصغير اللي على الديد زعطوط
وقالن توقع لا تخبط تخباط=ما انته وغد راسك من الشيب مشموط
يابو حمد بالك تفرط تفراط=اقنع برزقك وانت رجال مضبوط
خل الهوى للي يفحط تفحاط=يطيح مع دربه كفرات وجنوط
حذف الحصى قفوة تقل حذف نباط=ومن الحيا وجهة مجرد ومقشوط
اللي ليا منه شبع بالهوى شاط=عشقة مع الحارات لفات وفحوط
عشقة خيال وفيه رجَه وخراط=عقلة نمط سيكل مسامير وبلوط
لو يازنونه ماوزن ربع قيراط=مثل الذي ريشة به ارناق ونقوط
اللي على روس المراقيب نغاط=يطير ويوقع على راس زربوط
والإ انت صاحب عرف راوي وفقاط=سباح ببحور العماليق وتغوط
ما أنته وغد تعطى حلاوة وشقلاط=العرف له عندك مطارات وهبوط
بالعرف لك قيمة وبالشعر عملاط=وبالطيب منهاجك بالأمجاد مربوط
شاعر وعندك ذوق لأشعار الانباط=لا لا تختبرني مع ملفات وخطوط
خل السوالف بيننا بصط وابصاط=العقل كنز وذارف الحب ملقوط
والناس كلٍ له محيط به امحاط=المتزن واللي من العقل مفروط
وترى الثقة بالنفس من خير الاشواط=وكلً حسابه في سجله ومفقوط
بدر الحويفي=